Alola kolabora ho MSS Liquica apoio Pakote Umanitaria ba Vitima Dezastre Naturais

Reprezentante MSS no Ofisal Terenu Alola entrega Pakote Umanitarian Alola ba Vitima iha Aldeia Morae - Maubara.

0
94

AQA TIMOR – Fundasaun Alola liu husi programa Advokasia entrega ofisialmente apoio umanitarian hamutuk pakote 10 ba reprezentante MSS Munisipiu Liquica, Sra. Herminia Sarmentu iha edifisiu Fundasaun Alola, Mascarinhas. Pakote ne’ebe entrega horisehik (3/21) hanesan parte ida husi responsibilidade Fundasaun Alola nian hodi hakman sofrementu vitima husi desastres naturais ne’ebe foin dadaun akontese liu-liu inan no labarik sira.

“Apoio ne’ebe fornese liga ba Alola nia funsaun oinsa bele haree feto, labarik no inan isin rua sira ne’ebe sai vitima husi desastres naturais ne’ebe akontese iha Munisipiu Liquica”, esplika Maria Evelima, Jerente Programa Advokasia – Alola.

Iha fatin hanesan, Herminia Sarmentu nu’udar Tekniku Sosial ba Protesaun Feto, MSS Munisipiu Liquica realsa katak durante loron 2 halao verifikasaun iha Suku Vaviquinia – Aldeia Morae no Suku Gugleur-Aldeia Rainaban, ekipa MSS Liquica identifika familia hamutuk 35 sai vitima husi desastres naturais foin dadaun akontese iha Posto Administrativu Maubara. Nia mos hatutan katak pakote umanitarian hamutuk 10 husi Alola sei aloka ba vitima sira ne’ebe isin rua, feto ne’ebe ho labarik kiik oan inklui mos labarik sira.

“Durante ne’e MSS liu husi diresaun Desastres Naturais apoio deit material injeral hanesan nesesidade uma kain nian nomos nesesidade baziku, material espesifikamente ba inan isin rua no labarik sira seidauk tama ba pakote governo nian,”haktuir Herminia depois simu pakote umanitaria.

Nu’udar Teknik Sosial ba Protesaun Feto, nia mos hanoin katak ba futuru, MSS presiza duni kria pakote umanitaria ne’ebe espesifika ba feto no labarik sira atu nune’e bainhira iha akontesementu desastres naturais, governo liu husi MSS bele fo ajuda nesesidade ba familia hot-hotu inklui nesesidade feto isin rua no labarik sira.

Pakote Umanitarian Alola hanesan forma asisténsia ne’ebe durante tinan 10 resin ezisti iha programa Alola hodi ajuda feto sobrevivente husi violénsia baseia ba janeru nian. Pakote ne’e rasik prepara husi ekipa serbisu Sentru Rekursu Feto , parte integradu husi atividade Programa Advokasi – Alola nian.

Jerente Programa Advokasia haktuir katak iha Pakote Asistensia Umanitarian Alola kompostu husi nesesidade ne’ebe inan no oan sira presiza hanesan sabaun, lifa, pastadente, ropa kiik ba oan sira no sasan sira seluk. Nia mos reforsa tan katak Alola nu’udar membru ida husi Rede Referral ne’ebe tau matan ba sobreviventes husi violensia baseia ba jeneru orgulhu tebes bele fornese apoio pakote sira ne’e ba membru seluk husi Rede Referal ne’e inklui Ministeriu Solidariedade Sosial (MSS)

“Importante bele estabelese linha koordenasaun diak tanba kuandu iha akontesementu hanesan desastres naturais, membru Rede Referral sira inklui mos MSS no Fundasaun Alola bele atende lalais nesesidade feto no labarik sira”, informa Jerente Alola ba programa Advokasia iha ninia serbisu fatin.

Kolaborasaun serbisu entre MSS no Fundasaun Alola ida ne’e hanesan parte ida husi responsibilidade instituisaun rua ne’e nu’udar member Rede Referral ninian. Kolaborasaun ne’ebe iha laos deit kobre nivel nasional deit maibe kobre mos to’o nivel munisipiu.

“Iha futuru presiza linha koordenasaun ne’ebe diak hodi bele ajuda saida deit problema ne’ebe sempre feto no labarik hasoru, laos deit problema desastre naturais maibe problema liu-liu oinsa atende feto no labarik sira ne’ebe sai sobrevivente husi violensia baseia ba jeneru nian”, informa Maria Evelina iha edifisiu Alola.

Fontes: Mídia Alola Foundation

LEAVE A REPLY